شعر شعبي عراقي .. عامية

أمي .. أمي ..صباح الخير يا أمي

يا يمه يانظر عيني
يافرحة عمري وسنيني
احسّج من تلاكَيني
رفيف الطير
حنان الطير .. يا أمي

يايمه لو برد حيلي
سهرانه علي ليلي
وانتِ يمي تدعيلي
دعاج يصير
دوايه يصير .. يا أمي

يايمه يابعد روحي
ياطيبه بريحتجي فوحي
يابلسم يطيب جروحي
ابدعاج الخير
يدوم الخير .. يا أمي

حكمت البيداري
بغداد 1989

http://www.bidaro.com

http://albidari.bidaro.com

http://albidary.bidaro.com 
 
 

ابتسم ارجوك

ابتسم ارجوك ولو لحظه ابتسم
ليش الحزن والهم على وجهك يرتسم
عيش عمرك ساعه ساعه
بكره تندم على ضياعه
والندم كاساته سم

ابتسم ارجوك ولو مرة ابتسم

ياحبيب العمر واغلى
الدنيا حلوه وانت احلى
كل مصاعبها تهون
بسحر رمشك والعيون
اغمزلها اتصير سهلى

عيش عمرك ساعه ساعه
بكره تندم على ضياعه
ابتسم ارجوك ولو مره ابتسم

اقترب مني تعال
انعيد ايام الوصال
يكفي تحرم روحي منك
احير من تسالني عنك
بعدك الها هوايه طال

عيش عمرك ساعه ساعه
بكره تندم على ضياعه
ابتسم ارجوك ولو مره ابتسم

ياحياتي ياصبر مرمر مهجتي
المن اشكي همومي المن وانتَ علتي
كافي تظلم كَلبي كافي
عيوني تسهر وانت غافي
يمتى تضحكلي يمتى ترجّع ضحكتي

عيش عمرك ساعه ساعه
بكره تندم على ضياعه
ابتسم ارجوك ولو مره ابتسم
..

حكمت البيداري

نحبكم

احنهَ انحبكم يا هل ناس
شكد ما بالروح من احساس

انتوا الهوا انتوا الريّا
انتوا الزاد انتوا الميّا

لولاكم يموتنا الجوع
والعطش ييبس لظلوع

وتنكطع بينا الانفاس
ياناس رحمونا اشويا
..
نحبكم للاه باآلاه
يل سببتوا النا ألآه

ما عدنه وياكم كل غايه
غيرالحب واحلى حجايه

ليش الصد ياهل ناس
منوا الراح واخذوياه
..
جم دوب انظل نترجاكم
واحنه الما قصرنا وياكم

فتحنا قلوبنا عالبابين
وشلناكم برموش العين

وحطيناكم فوك الراس
كل هاي وما نال رضاكم
..
سلمنا وما رديتوا
وياكم جينه وماجيتوا

عين ابعين شفناكم
تميلون عنا اشجاكم

عدكم قسوة ماتنقاس
ياويله من حبكم يهوا
..

حكمت البيداري

اسمك ياعراق

وين ينام . وين ينام ويغفى
شفى اتغار وتحسد . تغار وتحسد شفه

احتار الكلب يظمك وين .. لكل دكه تصحالك عين
اسمك ياعراق .. وين ينام ويغفى
..
اسمك لو ناديته .. لو ناديته يتمنى
بصوته البلبل بيه .. يغرد بيه ويتغنى

حلو النغم حلو المعنى .. هلاهل اعراس وحنى
اسمك ياعراق .. وين ينام ويغفى

اسمك مثل الغيمه .. مثل الغيمه الطيبه
تمطر فرح وخير .. فرح وخير حبيبه

نافوره من مي الجنه .. العطشان عليك يتعنى

اسمك ياعراق .. وين ينام ويغفى

اسمك شمس وتشرق .. تشرق وتمحى الظلمه
اتشوف التايه وين .. دربه منين اتعلمه

تعلمه وين دربه منين  .. مو لمفتح حتى الاعمى

اسمك ياعراق .. وين ينام ويغفى
..

حكمت البيداري

عراقنا الاحلى

احلى من عراقنا مانلكه
وين ما نروح

شما فرحنه شما حزنه
شما حملنه جروح

طيور طرنه ولفينه
العالم لف

الدنيا كلها ابجفه
وطنه ابجف

افيش ياعراقنا افيش
يل طاريك يرد الروح
..
ياعراقنا

يانبع الحنان
الطيبه والوجدان

ياعراقنا

يادار الامان
الدين والايمان

مهد الحظارة دمت
مثل شمس ما غبت

تبقى وي الزمان
تبقى .. ياعراقنا
..

حكمت البيداري

اهم شي

يكون الك ثقه بنفسك
اهم شي لاتقبل احد يمسك

كول اشما عندك وبكل صراحه احجي
المن تظم دمعك بحزن وفرح ابجي

ولت سكت ابد حسك
..
اهم شي

ازرع الخير لكل الناس
لابد يوم تحصد الخير وي الناس

الدنيا حلوه ابناسها
همه اساس اساسها

وانت واحد من هل الناس
..
هم شي

خليك مسامح خل قلبك جبير
بالك يوم تنسى بس الله الجبير

وتحمل زللات الجاهل
عل الحق ابدا لا لتجامل

عيش حر مثل الطير
وين اتريد روح طير
..
هم شي

انصحك لا لتغامر
لا تبدل يومك اباجر

احلامك خليها حقيقه
مثل احلام العصفور

عش زغير بشجرة حديقه
وحبيبه تمليه زهور

وبغير جدك لا لتكابر

اهم شي
..

حكمت البيداري

 

ياغريب

ارجع وكافي
كافي تصبر السنين

وطنك صدره دافي
مليان حب وحنين

عيشت الغربه مذله
ارجع لبيتك واهله

لشوكت تبقى دمعتك
ابطرف عينك يل حزين

يا غريب

هناك بالغربه وحيد
تنام تصحى عالبريد

احنه هم مثلك نتاني
كل رساله هلال عيد

عيشت الغربه مذله
ارجع لبيتك واهله

لشوكت تبقى دمعتك
ابطرف عينك يل حزين
..
يا عراقي يا اصيل
تنسى اصلك مستحيل

والوطن مثلك واكثر
ما اللا بالدنيا مثيل

عيشت الغربه مذله
ارجع لبيتك واهله

لشوكت تبقى دمعتك
ابطرف عينك يل حزين
..
يكفي عذاب الفراق
والهجر مر المذاق

يله شد حيلك تعال
يل ارجع للعراق

عيشت الغربه مذله
ارجع لبيتك واهله

لشوكت تبقى دمعتك
ابطرف عينك يل حزين

يا غريب
..

حكمت البيداري
9 نيسان 2004

من اشوفك

انا من اشوفك
احس بالأمان

وروحي بوجودك
يغمرها الحنان

وياك يا ارق انسان
انسى الزمان
انسى المكان
انا من اشوفك
..
يا احلى حلم من الأحلام
قلبي بهواك حب وهام

جمعتني وياك احلى صدفه
بأسعد يوم من الأيام

انسى الزمان
انسى المكان
انا من اشوفك
..
بنظرة خجولة ترسل سلام
همس النسيم دافيء الكلام

يامن بنورك نورت روحي
ودنياي قبلك كانت ظلام

انسى الزمان
انسى المكان
انا من اشوفك
..
اتمنى لو اغفى وأنام
ليله على صدرك مثل الحمام

شيصر لو ابقى اعيش
ولوعمري طال الف عام

انسى الزمان
انسى المكان
انا من اشوفك
..

حكمت البيداري

بعدك حبيبي عالبال

انت ذاك . هذاك انت
بعدك حبيبي عالبال

ابكلبي ذاك هذاك انت
لا ما يغيرني حال

كلما امر بالديره
اذكر ايام الجيره

اشلون انساك
ابكلبي ذاك

ابروحي ذاك
انت ذاك

هذاك انت  .. هذاك انت
..
يا احلى احلام العمر
ياعشك ايام الزغر

من يم بابكم من مريت
حنيت الك واشتاكيت

اخذني الشوق .. لبعيد ابعيد . بعيد ابعيد
وتمنيت انا وياك .. انرد ازغار .. وبعمر جديد

لكن ياوسفه .. ياوسفه
خذانه الشيب وبان الكبر

يا احلى ايام الزغر
..
اني ابذكرك .. دوم ابذكرك
اي والله .. اي والله

بكل افراحي .. بكل احزاني
ضحكه ابضحكه .. اه باه اه باه

طيفك مافارك خيالي
يا كمر منور الليالي

وين ماروح انت ويايه
ابطرف لساني بكل حجايه

حبك يسري بروحي ودمي
يجري وياه .. يجري وياه
..
اللي راح مايرجع
مثل ماكان .. مايرجع

اعيش الذكره واتوجع
يا انسان من يتذكر ما يتوجع

لاكن شيفيد .. شيفيد الندم
كدام عيونه . كلشي انهدم

اعتب عليك .. عليك يازمن
يازمن ماالك امان

اللي راح مايرجع
مثل ماكان مايرجع
..

حكمت البيداري

جرح القلب

جرح القلب احساس .. ما يطيبه التداوي
ماظل ثقه بالناس … بعد المن اخاوي

كل ظني اللي خلان … تالي طلعوا عدوان
ردوا جزا الاحسان … ردوه غدر وبلاوي

هل ناس
..
ايام الحزن تمر دوم … طويله وثكيله
لحظات الفرح ماتدوم … قصيره وقليله

يامن اشتريته وباع … تندم تراك ابساع
ما تجني غير الفكر … يلي عشت حيله

وي الناس
..
اللي يكع مظلوم … تكثر سكاكينه
غربان بين اتحوم … ابيساره ويمينه

الدنيا تراها ادور … تهدم قلاع وقصور
والما اله منكم عون … الله . الله اليعينه
من الناس
..

حكمت البيداري
22.12.2002

من يابشر انتَ

شتريد اسميك – شتريد اوصفك
من يابشر انت – يا بشر صنفك

وجه بوجه لاكيتك
عين ابعين خليتك

سلمت والسلام لاالله . رديت
اسف . اسف اني ما اعرفك
– -
انت الكنت عندي اعز احبابي
احلى ايام عمري فرحة شبابي

بلاسبب صديت عني بلاسبب
اني الك بس الك مفتوح بابي

اشكيك للباري تعالى – ياريت تتعذب عذابي
وجه بوجه لاكيتك – عين ابعين خليتك

سلمت والسلام لاالله . رديت
اسف . اسف اني ما اعرفك
– -
لاتظن طابت جروحي- لاتظن نساني هجرك
لو كنت انت ساهي – لو تحب . اتريد اذكرك

شفايفي ياما رسمت آهات
على شفايفك . فوك صدرك

همه من يشهد عليك – على نكرانك وغدرك
وجه بوجه لاكيتك – عين ابعين خليتك

سلمت والسلام لاالله . رديت
اسف . اسف اني ما اعرفك
..

حكمت البيداري
2002

طير الَكَطى

قلبي الك .. طير الكطى

ارجوك لاتفكر بالخطى .. اخذني الك ستر وغطى
غيرك انت ما اللي حبيب .. ياشمس عمري لا تغيب
قلبي الك طير الكطى
..

معي لا تلعب بالخفى .. ملكك انا بحب و وفى
ليله على صدر ليلاه .. يا مسعده النام وغفى
غيرك انت ما اللى حبيب
..

تبخل علي ابقبلة شفه .. قلبي العليل وانت الشفى
ارحم بحالي عل جرالي .. زاد نارك وما طفى
غيرك انت ما اللي حبيب
..

احلم معك بلحظة صفى .. همسك رقيق كلامك دفى
ساحرني حسنك يا جمالك .. حاير انا كيف اوصفه
غيرك انت ما اللي حبيب
..
حكمت البيداري
2001

 

شي وانكسر

شي وانكسر
مايرجع صحيح
يبقى الاثر
يبقى يذكر الجريح
انصحك كبل العتب
احسب حساب السبب
مهما صبر
اللي يتألم يصيح
شيء وانكسر
..
ياصديقي
العمر ايام تمضي
حلوه ومره
ايام دموع وحزن
ايام ضحكه ومسره
..
ياصديقي
احنه هم لابد . لازم نضحي
الناس كلها امضحيه
ايام غيم ومطر
ايام شمس ومصحيه
ثمر الشجر
لابد . لازم يطيح
شي وانكسر
مايرجع صحيح
..
ياصديقي
اللي فاتك راح
لاترجع تعده
الجاي الك هم راح
رايح تهده
..
ياصديقي
اللي باعك اشتريه بسعره
لا تبيعه
اخذ من غدره عبره
لا تضيعه
اتعب اكثر
اكثر من ما تستريح
شي وانكسر
مايرجع صحيح
..

حكمت البيداري

بغداد 1996
مهداة لصديق عمري
الاستاذ دانيال ميخائيل دانيال المحترم مع التقدير

ضرير

ضرير
بس من حقي احب
انسان عندي روح وكلب
المشاعر نفس المشاعر بيني وبينك
اني احس بوجودك وانته تشوف ابعينك
مثلك افرح مثلك اضحك
مثلك احزن ودموعي تصب
..
ضرير
هذا هوا قدري
مو بيدي امري
مؤمن بامر الله ينورلي روحي نور
مؤمن بامر الله اعبر ظلام البحور
ومو كل البشر تملك مثل صبري
..
ضرير
لكن..افكاري دافئه جميله
وعواطفي شفافه نبيله
دوم تلكاني مبتسم
وصادق في كلامي
ما افرق من اسلم
للناس كلها سلامي
هذا طبعي ما اعرف الحيله
..
ضرير
تكفيني عصاتي وهى دلليل الضرير
احلامي بسيطه مثل احلام العصافير
اثق بكل الناس وانطيها ايدي
يوم الاصادف صديق يصير عيدي
يكفيني امشي وياه
ما اطمع اطير
ضرير
..

حكمت البيداري
بغداد 1998

ياكَمر دزلي خبر

ياكَمر
ياكَمر دزلي خبر وين الكَاه
ياكَمر كَلبي الصبر شلون ينساه
كَله يمر بيا عطشانه حنييا
من حبه يروني انا فراكَه ياذيني
..
ياكَمر من غاب عني ها مرت سنه
ياكَمر بس نوح وني ماظكََت الهنا
كله يمر بيا
..
ياكَمر خبرني عنه ليوين اتاني
ياكَمر ناسيني جنه ناسي حناني
كَله يمر بيا
..
ياكَمر مشتاكه روحي لحبي وحبيبي
ياكَمر كثرت جروحي وهوا طبيبي
كَله يمر بيا
..

حكمت البيداري
غناء الفنان عادل عكله

يابيت الاحباب

حلمان
حلمان الك رديت
يابيت الاحباب
حلمان اصيح بصوت يا يمه يا ياب
متلهف اريد اشوفكم
فدوه رحت لعيونكم
يللا يا خوتي وينكم
فتحولي هل الباب
..
يابيت اجيتك تعبان
متغرب انا من سنين
يا بيت الك عطشان
ارويني حب وحنين
بالباب ادك حيران
شو محد يرد ياعين
يابيت وين الاهل
وين ارحلوا وين
..
يابيت ياعشرت عمر
ربينا على عتبتك
مابين حزن وفرح مر
مر وحلى سلوتك
ياما صبرنا عالهجر
الايام صارت سنين
يابيت وين الاهل
وين رحلوا وين
..
يابيت ابقى عالعهد
ابقى على هيبتك
المهد انت واللحد
هنيال ساكن تربتك
ياريت يطول الحلم
ماتطلع شمس عالعين
يابيت وين الاهل
وين ارحلوا وين
..

حكمت البيداري
27-6-1999

محتاج الك

محتاج الك . يمي اريدك . انت وين . وين
محتاج الك مدلي ايدك . امسح دموع العين
وياك يابلسم جروحي
من الالم ترتاح روح
انت وين محتاج الك
..
حبنه من يوم الهجرته . غابت افراحه وضكته
الناس مسروره وتغني . وانا وي نوحي ووني
علي دربك وانتظارك
ابقى لو عمري خسرته
انت وين محتاج الك
..
من فراكك رايح اجن . شوكك طحن جبدي طحن
شللي بعيوني ونظرها . لون طيفك ما يمرها
شيصير لو تذكرني مره
ويوم لو كلبك يحن
انت وين وين محتاج الك
..
با سمك اصيح بعلو صوتي . وينك يا مكَربلي موتي
يمتى يا مسبب عذابي . تجي وتدك علي بابي
تعال اسكن وسط قلبي
هوا بيتي الك بيتي
انت وين محتاج الك
..
حكمت البيداري
2.1.2005

مظلوم الزمن

مظلوم الزمن
لو حزنه .. ذنب الزمن صحنى وكلنه
لو فرحنه .. صار ويانه والنه يضحكلنه
مظلوم الزمن
..
الزمن ما اللى تاثير.. الغلط منا وبينه
احنا الحفرنه البير.. واخذتنه اللى رجلينه
حلمنه انطير ونعله .. ابعد وابعد من الاحلام
طمعنه نملك اكثر .. حتى لو ذنوب وحرام
ما حسبنا اللي يطير بلاجناح .. راح يتعب ويوكع
ما حسبنا من خبز الحرام .. اشما اكلنه ما نشبع
واللى امن من الزمن .. اكيد على روحه امن
..
الزمن مثل الذهب بس احنه انعمينه
ما كدرنه انشوف ابعد من راحت ادينه
ماكدرنه انثمن وكته .. ونعيش كلنه ابسلام
سلمنه ورضينه بالسكته .. ونسينه حتى الكلام
ماعرفنه اشلون انوره لو خييم علينه الظلام
لابد كنا نحترمه وهيى هاي الحقيقه
ونشعل لايام الظلمه ولو شمعه ابطريقه
كلنا تهنه و ضعنه واحتركنه بوهمنه وحريقه
واللى امن من الزمن اكيد على روحه امن
..

حكمت البيداري
8.6.2000

 

من دون كل الناس

من دون كل الناس .. انت
الرقه والاحساس .. انت
يانبع يروي حنان
بجفوفك بر الامان
تاج انت فوك الراس
حبي الك ما ينقاس
من دون كل الناس .. انت
..
كلامك حبيبي طعمه عسل
همسك عواطف مليانه امل
انت الملك والامير
يا ابو الكلب الجبير
يللي بصفاتك ماصار وحصل
..
احلامي حبيبي اغلى الامنيات
وياك ياروحي شمحلى الحياة
خليت عمري دوم
يوم اسعده من يوم
ماكدرت علينا شلت الشمات
..
يحرسك حبيبي رب العباد
يحميك . يبعدك عن الحساد
ياجنتي ياملاك
العذال كلها فداك
يا من سكن مهجتي
ولب الفؤاد
من دون كل الناس انت
..

حكمت البيداري
 2002

هوايه حجينا

هواي حجينا وكررنا الكلام
اكثر من مره تبادلنا الخصام
عتابك ممل . عتابي امل
من ايديك ومن ايديا ضيعنا الامل
اشكد ما عليك . عليا من الملام ..
….
اتجاهلتك وجاهلتني ابكل برود
عود ما بعد انت تحبني واحبك عود
اني هم مثلك فكرت
وبكل غرور مثلك اتكبرت
اضحكت عود اني اضحكت
اثاري على نفسي اضحكت
وضحكنا علينا الناس والايام
عتابك ممل
….
الذنب منك ومني
قلدنا اشغنى المغني
مثل الاطفال كسرنا اللعبه
ماعرفنا الحب اشيعني
الحب مايتقلد ابدا ابدا ولا يتكرر
الحب تحفه شيظل بيها من تتكسر
ارجوك ..لا تحاول تلم بقية الحطام
عتابك ممل وعتابي امل
من اديك واديا ظيعنا الامل
..

حكمت البيداري
16/6/2000 بغداد

هي .. لامو هي

هيى لامو هيى .. هيى يمكن هيى
اصبر ياقلبي اشويه .. اشخلاها تمر بيا
وانت زين..زين تدري .. قصتي وياها منسيه
هيى لامو هيى
..
ياكَلبي كول اشجاك .. حاير ومحيرني وياك
اتركها بالك تسأل .. ترا اني منك ازعل
وانت زين..زين تدري .. قصتي وياها منسيه
هيى لا مو هيى
..
ياكَلبي انا اترجاك .. خايب لا تحن تشتاك
ارحمني كافي اتمهل .. نظرتها ما اتحمل
واانت زين..زين تدري .. قصتي وياه منسيه
هيى لا مو هي
..
ياكَلبي يكفي فراك .. ضيعت عمرك تراك
حاجيها ليش الخجل .. لبابك نصيبك وصل
وانت زين..زين تدري .. قصتي وياها بس هيه
هيى لامو هيى
..

حكمت البيداري
2.12.1999

جربنا الناس والدنيا

جربنا الناس والدنيا .. جربنا وكَلنا اتعلمنا
نسينا اشصار ردينا .. ردينا ردود سلمنا
ردينا ردود . ردينا ردود اتندمنا
..
كَال المثل . التجربه اكبر برهان
يا بشر . احذر وعيش بامان

زرعنا الحب لكل الناس
اثاري الدنيا ناس وناس

ناس اتحبها وهي تكرهك . وانت الحباب
انت اداوي وهي اتجرحك . بلا اسباب

ماتفرح الا باحزانك .. ماتحزن الا بافراحك
وناس عين الله عليها .. من الكَلب تنطي بديها

عندها المحبه طبع .. وشراع لكل سفينه
عندها المحنه نبع .. ابد ماينضب حنينه

لو حجت شمحلى حجيها
يختلط ضحكها ابجيها

ناس شوفتتها فرح
الصدر الها انشرح
الكَلب ابحصرتها انجرح

ناس ماطاحت بدينا .. ناس لوشفتها انعمينا
ارجع واكَول .جربنا الناس والدنيا
..

حكمت البيداري

وياك ياطير الحمام

وياك وياك ..ياطير الحمام
وياك وياك ..وصلي سلام
كََله وحجيله عليا …كََله هجره اسوا بيا
فراك الاحاب حرام
..
كََله عذبني حنيني … لاخبر منه يجيني
لشوفته مشتاكه عيني … الليل ماتغفى وتنام
وياك وياك
..
كََله من بعدك ياغالي … المن اشكي هذا حالي
غايب انت وعلى بالي … عشرتك واحلى الكلام
وياك وياك
..
كََله هذا العمر شمعه .. يذوب دمعه على دمعه
ليش من عدنه نظيعه .. ياعمر للناس دام
وياك وياك
..

حكمت البيداري

هوايه مرات

مرات
تجيني التهايم
واني غافي نايم

مرات
تجيني البلاوي
هيج غفلاوي

ومرات
امد ايدي للتمساح
 للاسد يشمها
وترجعلي سلامات

ومرات امد ايدي للناس
تعضها وتسممها
ياوسفه حرامات

ومرات
هوايا مرات

عود كلشي اتعلمت وحزرت
التالي قبل عمري بهوايا كبرت

ومرات
هوايا مرات

هموم يابو هموم
وشكد مصايب
على راسي  شلت

اشكال وارناك
والوان البشرجربت
ومنهم ياما اتحملت

ومرات
 هوايا مرات

على ايد اعز احبابي
اعز احبابي احتركت

واجرعت ظيم
ظيم وقهر
قلت مايخالف
وسكتت

سامحت
ياما سامحت

انجرحت
ياما انجرحت

بس بعد ما يفيد
شيفيد العتاب الفات فات

قلبي وبهل ايد وهل ايد
طميته دفنته مات

حكمت البيداري
6-11-2005

 

 

 

 

 

About these ads

أضف تعليق

Please log in using one of these methods to post your comment:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s

تابع

Get every new post delivered to your Inbox.

%d مدونون معجبون بهذه: